Poem. Neerenda

విరించి  ll నీరెండ ll
---------------

ప్రపంచం మారిపోతుందా
అడిగినట్టు చూశాడతడు
కొలనులో గుడ్డలతోసహా నిండా మునిగి
గట్టు మీద బట్టలారబెట్టుకుంటూ...

సాయంత్రపు నీరెండలో
నీరెంతో ఎండెంతో అపుడే తెలిసినట్టయిందతనికి
ఆ రాత్రికల్లా కురిసే మేఘమైపోవాలని
అప్పటికప్పుడే గడ్డగట్టుకుని పోయాడతడు
వెన్నులో చలిలా మొదలైన భయపు అనుభవం నాది

జీవితమంటే బండపై నిలబడి
ఒంటిమీది తడి గుడ్దలను పిండుకోవడం
తడి పాదాల ముద్రలు వేసి వెళ్లిపోవడం అంతేగా..! అన్నాను నేను
ఎండ అన్నిటినీ ఎండగొడుతుందేమో
ఆరిపోతున్న పాదపు ముద్రలు చూస్తూ ఉండిపోయాడతడు

ప్రళయం అంటే అంతా నీరేనా ..! అడిగాడతడు
ప్రతీ ఎండాకాలపు కొలను అడుగున
ఒంటరిగా మిగిలిన శివలింగాన్ని గుర్తు చేసుకున్నాన్నేను.
నీరెండలో మా నీడలు ఎంత దూరంగా సాగి ఆవిరయ్యాయో...
ప్రపంచం మారినా సాయంత్రమెప్పటికీ మారదనుకున్నాం.

3/10/17

Comments

Post a Comment

Popular posts from this blog

చూపుడు వేలు. కవిత

విరించి ll చూపుడు వేలు ll ---------------------------------------- ఇదేమీ పిడికిళ్ల వ్యవసాయం కాదు సూర్యుడు మనం మొలకెత్తమన్న చోటల్లా మొలకెత్తడు కలం పారించేది ఎంతకైనా రక్తం కాకూడదు కానీ పదం చేతబట్టుకున్న తొందరలో పదం హృదయానికి తట్టుకున్న ఆనందంలో నీకు తెలియకుండానే ఎంతెంత దూరం పాకాలని చూశావో.. ఎందరెందరి ఆకలి పేగులను ఉరికొయ్యకు అర్పించాలని అనుకున్నావో.. తమ్ముడా ఇదే అరణ్యం. దండనల అరణ్యం. క్రూరజంతువులు మనుషులు రూపంలో సంచరించే జనారణ్యం చేతిలో పదమున్నవాడు గొంతులో గేయమున్నవాడు డప్పుల మోతలతో హూరెత్తించాల్సిన దివ్య స్థానం. చెట్ల మధ్యన..పుట్ల మధ్యన నిప్పులు వేసి మహూగ్రంగా పుట్టించే దావానలానికి బూడిద తప్ప మరో ఫలితం లేదు. ఇప్పుడు నిప్పులు కాదు ఆలోచనలు కావాలి. అడవినిప్పులు ఇక్కడ చిప్పిల్లాలి. రాజ్యం మీద చేసే పోరాటంలో ఆకలి పోరాటాల ఊసెత్తకపోతివే ఆకలికి మసిలే వాడిలో రక్తమెంతగా మరుగుతుందో తెలిసిన వాడివి నీ పాటతో చల్లబరచలేకపోతివే.. గుండెల్లోకి తూటా దిగినంత సులువుగా మాట దిగక పోవచ్చు కానీ మాట పాటౌతది. పాట పథమోతది. పొద్దుగాల ఇన్న పాట రాత్రి దాకా వినబడుతున్నట్టు నీ పాట చెవ...
Read more

ఆరాల వాళ్ళు. కవిత

విరించి ll ఆరాల వాళ్ళు ll ------------------------------------ కమ్మని కవిత్వం నేను రాస్తానన్నాను. అందులో మా కులముందన్నారు వాళ్ళు. ఛందో బద్ద పద్యం చేస్తానన్నాను నేను. దారపు పోగులున్నాయా అని అడిగారు వాళ్ళు ఆకలిని ఇంకుతో  పేపరుపై చెక్కుతానన్నాను ఎర్రింకు వాడకూడదన్నారు వాళ్ళు. పాట పాడుతూ సాపాటు మరుస్తానన్నాను. లోలోపలనే పాడుకోమన్నారు వాళ్ళు శ్రామికుడి కండల శిల్పం చెక్కుతానన్నాను శిలలా నిలబడిపొమ్మన్నారు వాళ్ళు. విశ్వనరుణ్ణి చిత్రిక పడతానన్నాను ముఖం చిట్లించి నాదేవూరని అడిగారువాళ్ళు. చిన్నారుల నవ్వుల్లా నాట్యం చేస్తానన్నాను చీపని చీదరించుకున్నారు వాళ్ళు. కళ ఏదీ లేనపుడు బతకడం ఎందుకన్నాను నేను. చావడం మంచిదన్నారు వాళ్ళు. ఎవరు మీరంతా అడిగాను నేను కవులమన్నారు వాళ్ళు కళాకారులమన్నారు వాళ్ళు. కాళ్ళు కాలుతూ ఎడారిలో నిలబడి నేను పీఠాలమీద నీడల్లా బాసింపట్టుతో వాళ్ళు. కులమేదని మతమేదని ప్రాంతమేదని పార్టీ ఏదనే ఆరాల వాళ్ళు నిబిడాశ్ఛర్యంలో నేను. విషం కక్కుతూ వాళ్ళు. 9/5/18
Read more

Kaala film review

"కాలా" A film for coming Elections? ------------------------------------------- "కాలా" సినిమా చూసినపుడు రెండు విషయాలు కనిపిస్తాయి. ఒకటి దర్శకత్వ ప్రతిభ. చెప్పదలచుకున్న అంశాన్ని వివిధ దశలలో కనుల ముందు దర్శింప చేయటంలో పా.రంజిత్ విజయాన్ని సాధించాడు. తమిళ ఫార్ములా సినిమాలకు భిన్నమైన కథను కథనాన్ని అతడు తెరమీద నిలుప గలిగాడు. కెమెరాను ఉపయోగించిన విధానం గానీ, సినిమా పేసింగ్ ను అవసరమున్న చోట తగ్గించిన విధానం గానీ..బీజీఎం సహాయంతో అవసరమైన ఎమోషన్ ని రాబట్టడంలో గానీ ఇంటర్వెల్ బ్యాంగ్, క్లైమాక్స్ బ్యాంగ్ లను మలచిన విధానం గానీ, ఆర్టిస్ట్ ల ముఖాలను మాత్రమే హైలైట్ చేసిన విధానం గానీ చాలా కొత్తగా, విభిన్నంగా ఉన్నాయి. కథ చెబుతున్న కెమెరా, కథతో పాటుగా ఎన్నో ప్రాపర్టీస్ ను కథకు తోడ్పడే విధంగా మలుచుకుంటుంది. అసురుడు పుస్తకం కనబడటమే కావచ్చు లేదా బౌద్ధాలయం కావచ్చు, అంబేద్కర్ పెరియార్ ల పటాలే కావచ్చు,  అవి చెప్పదలచుకున్న అంశానికి తగినంత ఫిలాసాఫికల్ బ్యాగ్రౌండ్ ని ఏర్పరచటానికి ఉపయోగ పడ్డాయి. ఇటువంటి విధానం కమల్ హాసన్ తీసిన "హేరామ్" సినిమాలోనూ కనిపిస్తుంది. కానీ రంజిత్ ముఖ్యమైన...
Read more